Түркияда окугум келет (2-бөлүм)

Буга чейин Түркияда бекер билим алуу жана ал үчүн аткарылуучу шарттар боюнча айтып берген элем. Мына эми, убактысы келип блогдун 2 – бөлүмүн да жазып отурам. Сөзүмдү баштаардан мурда блогдун  1- бөлүмүнө тийиштүү жазган пикирлериңиздер үчүн ыраазычылыгымды билдирмекчимин. Бул бөлүмдө Түркияда аткарылышы керек болгон бюрократиялык иштер тууралуу болмокчу.

Түркияга кантип келем?

Окууга тапшыруудагы бардык этаптар аяктагандан кийин сентябрь айында сизге Түркия мамлекетинин стипендиялык программалары (Түркие бурслары) тарабынан “документтериңиз кабыл алынды”, “Түркиядан тосуп алуу жана жатаканаларга жайгаштыруу”, “Учак билети” өңдүү билдирүү каттары келет. Ошондуктан электрондук почтаңызды тез-тезден текшерип туруңуз. Бул каттарда учак билети, жатакана жана каттоолор тууралуу маалымат берилет. Аталган каттардын 3-4 көчүрмөсүн кагаз түрүндө чыгарып алууңуз шарт. Алар Түркияга келгенден кийин жатаканага жана окууга жайга катталууда керек болот.

Учак билети программа тарабынан студенттин почтасына жөнөтүлөт же студенттер өздөрүнүн каалоосу боюнча сатып алса да болот. Мындай учурда билеттин өзүн жана квитанциясын сактап калуу шарт. Программа билеттин акчасын келгенден кийин студентке кайрып берет.

Ким тосуп алат?

Түркияга учуп келген студенттердин баарын Түркие бурсларынын өкүлдөрү Стамбулдагы аэропорттон тосуп алышат. Башка шаарга автобус менен кетчүлөрдү автобуска, учак менен барчуларды учактарына отургузушат. Мен Стамбулда калгандыктан, бизди жатаканага чейин жеткизишип жайгаштырышты. Бирок, тосуп алчуларды аэропортто көпкө чейин күтүүгө туура келет.

Кайсы жерде жашайм?

Студенттин кайсы жерде жашаары өзүнөн көз каранды. Кааласа жатаканада же жеке ижаралык үйдө, туугандарынын үйүндө жашса болот. Муну “Жатаканага жайгаштыруу” боюнча келген катка жооп берүүдө белгилөө керек. Жатаканада жашоону каалагандар аэропорттон тосулуп алынгандан кийин жатаканаларга жайгаштырылат. Жатаканасы окуусунан алыс же жакпай калгандар программага кат жазып, алмаштырып берүүсүн өтүнсө болот.

Жатаканага катталууда керектелчү документтер:

1)    “Жатаканага жайгаштыруу” боюнча келген каттын көчүрмөсү

2)    “Документтериңиздин кабыл алынышы” боюнча каттын көчүрмөсү

3)    Паспорт жана анын көчүрмөсү

4)    6 даана документтик сүрөт

5)    Медициналык справканын түркчө которулушунун көчүрмөсү

Университетке кантип катталам?

evrak

Университетке катталуу жана сабактарды тандоо окуу жайдын академиялык календарына жараша өтөт. Бакалаврда окугандар Студенттик бөлүмдө, докторантура жана магистратурада окугандар окуган багытына тийиштүү институтарындагы чет өлкөлүк студенттерди каттоо бөлүмүндө катталышат. Мисалы, гуманитариялык жана социалдык билим багыттары боюнча Социалдык билимдер институтунда каттоо жүргүзүлөт.

Керектүү документтер:

1)    Документтериңиздин кабыл алынышы боюнча каттын көчүрмөсү

2)    Программа менен түзүлгөн келишимдин көчүрмөсү

3)    Паспорт жана анын көчүрмөсү

4)    Диплом (бакалавр үчүн аттестат) жана анын көчүрмөсү

5)    Түрк тилин билүү боюнча С-1 даражасындагы TÖMER сертификаты

6)    Медициналык справка жана анын көчүрмөсү

P.S: Түрк университеттеринин жана лицейлеринин бүтүрүүчүлөрүнөн түрк тили боюнча сертификат талап кылынбайт. Бул үчүн каттоого программа тарабынан почтага жөнөтүлгөн каттоого жарамдуу дипломдор жөнүндө жазылган каттын көчүрмөсүн көрсөтүү шарт. Бирок, кээ бир окуу жайлар ага карабастан тил билүү боюнча сертификат талап кылышат. Мындай учурда окуу жайдын өзүнүн тил борборуна барып, сынактан өтүү шарт. Сынак окуп-түшүнүү, жазуу, угуу жана оозеки түрүндө өткөрүлөт. С-1 даражасындагы сертификатты ( 95 балл, кээ бир окуу жайларда 75 балл жетиштүү) албай калгандар жарым жыл же толук бир жыл программанын бекер тил курстарына катыша алат.

Мамлекеттик каттоону кантип өтөм?

Түркияга  келген күндөн баштап 30 күн аралыгында жашаган шаарыңыздагы  мигранттарды каттоо башкармалыгынын сайтынан www. goc.gov.tr  керектүү электрондук  форманы толтуруп, документтерди тапшырууга кезекке туруу шарт.  Кезек 2-3 айдан кийин деле келиши мүмкүн. Эң маанилүүсү өз убагындан кечиктирбей электрондук кезек  алып коюу.  Мамлекеттик каттоо күбөлүгү (İkamet tezkeresi) 1-1.5 айда даяр болот жана сиз көрсөткөн дарекке жеткирилет. Көпчүлүк учурда университеттин студенттик иштер бөлүмүнө келет. Керектүү документтер:

1)    Электрондук форманын кагаз түрүндөгү көчүрмөсү

2)    Паспорттун өзү жана виза менен биргеликте көчүрмөсү

3)    4 документтик фотосүрөт

4)    Университет тарабынан каттоого чейин эң кеч 2 күн мурун берилген студенттик күбөлүк (Öğrenci belgesi)

5)    Медициналык камсыздоо күбөлүгү

6)    Мамлекеттик каттоо күбөлүгү үчүн төлөнгөн акынын квитанциясы

P.S: Медициналык камсыздоо күбөлүгү Туркие бурслары программасы тарабынан жасалып берилет. Мындан улам каттоого барганда аталган программанын студенти экениңизди айтууңуз жетиштүү. Мамлекеттик каттоо күбөлүгү үчүн акы төлөө иштери  райондук же шаардык салык төлөө башкармалыктарында жүргүзүлөт.

Эң маанилүүсү документтериңизди Кыргызстандан эле толук жана так кылып топтоп келиңиз. Документтик сүрөттөн (3х4, 4х6) жана документтердин көчүрмөсүнөн 20-25 даана жасатып алыңыз. Бул жакта көчүрмө жасатуу жана сүрөт чыгартуу бираз кымбат.

Каттооңуз ийгиликтүү өтсүн!

8 comments on “Түркияда окугум келет (2-бөлүм)
  1. Азыркы программада созсуз турк тилин билуусун тактаган TOMER сертификаты керекпи, Университет созсуз ошонусун карайбы, тилди билгендиги тууралуу сертификаты жоктор да откон студенттер барбы, ал жакта барып 1 жыл оздору окуу курсунан откоро турган Университеттер барбы магистратурага?

    • Программага катталуу үчүн түрк тилин билүү милдеттүү эмес. Окууга кабыл алынгандан кийин программанын алкагында 1 жыл акысыз түрк тили боюнча даярдоо курсу окутулат.

  2. Чон рахмат!
    Эгер мен туркчо уйронуу курсунда бир жыл окусам ал учурда да стипендия бериле береби жана университетке катталуу тил курсун аяктагандан кийин жургузулобу же чейинби? Алдын ала чон рахмат!

  3. Саламатсызбы эже атым дилзат оштон болом 11классты быйыл аяктайм туркчону интернеттен давно уйронгом суроом мындай 11классты аяктап эле туркияда 1курс болуп окуса болобу же обязителна озубуздо 1же 2 жылча университетте окуу керекпи ватсап номерим сураныч эже кеңири маалымат алуум учун ушу номерге жазып коюн 0550797300

    • Саламатсыңбы Дилзат, бул жакка келгенден кийин түрк тили боюнча сынакка кирип сертификат алып дароо 1-курска отурсаң болот. Сынактан өтпөй калсаң 1 жыл же 1-семестр түркчө үйрөнүүгө туура келет. Туркчө даярдоо курсунда окуу акысыз. Күнүмдүк түркчө менен илимий туркчо айырмаланып турат

      • Саламатсызбы кайра эле мен дилзат жооп учун рахмат азыр ошмунун эл аралык мамилелер факултетинин 1кур студенттимин туркияда 2семестр окуйун дедим эле ал учун кимге же кайсыл агенттикке кайрылсам болот университеттегилерден сурасам толук маалымат бербей жатышат

        • салам, ал үчүн сиз окуган окуу жай менен Түркиядагы окуу жайлар менен студент алмашуу боюнча келишими болушу шарт. 2-курстан кийин гана “Эрасмус” жана “Мевлана” студент алмашуу программалары менен келүүгө болот.

Комментарий кошуу

Сиздин электрондук почтаңыз жарыяланбайт. Милдеттүү талаалар белгиленген *