Эже мени куткарыңызчы, алып кетиңизчи…

Стамбул

Расмий эмес маалыматтарга ылайык Стамбул шаарында 5 миңге чукул кыргыз мигранттары жашайт

Ошол күн кадимкидей эле баары пландалгандай башталган. Жолугушуулар, интервью, үйдөгүлөр менен сүйлөшүү… Кийинчерээк колум бошогондо анча-мынча иштеримди бүтүрөйүн деп жаңы эле интернетке киргем болчумун. Фейсбуктан Бишкектеги шакирттеримдин бирөөсү мага кат жазыптыр. Катты окуп, өзүнөн окуянын чоо-жайын сураштырдым. Мага берилген номерге чалдым. Трубканын ары жагынан “эже мени куткарыңызчы, алып кетиңизчи” деп жалынган жаш кыздын үнү угулду. Үстүмө бирөө муздак суу сепкендей чыйрыгып кеттим.

Алгач эле анын аты-жөнүн билээримди, Кыргызстандан ал тууралуу кабар алганымды айттым. Стамбулдун кайсы жеринде жашаарын сурадым. Бирок Айнуранын (аты өзгөртүлдү) жашаган жеринин дарегин билбегени маселени дагы да татаалдаштырды. Аңгыча өзү үйдө жалгыз экенин жана батирдин ачкычтары бар экенин айтып калды. Кошуналардын бирөө-жарымына кайрылып телефон аркылуу мени менен сүйлөштүрүүсүн сунуштадым. Жыйынтыгында дүкөнчү айымдын жардамы менен анын жашаган дарегин тактадым. Менин жатаканама жакын кварталда жашайт экен. Квартал жөнүндө айта кетсем, ал жерге кечинде гана эмес күндүзү баруу да кооптуу. Кечке маал болуп калган. Стамбулдагы Кыргызстандын консулдугуна кабар бердим. Алар Айнурага чалып, “эч ким деле тийишпептир го, бир нерсе болсо бизге чал” дешип телефонду өчүрүп коюшуптур. Муну укканда аны куткаруу жолдорун ойлонуштуруп баштадым. Анткени Айнуранын “коркуп жатам, алып кетиңизчи” деген сөздөрү жүрөгүмдү өйүп туруп алды. Тобокелге салып жатаканадагы кыздарга бара жаткан жеримдин дарегин айтып шашылыш чыгып кеттим. Жарым сааттын ичинде айтылган дарек боюнча издеп таптым. Айнура мени көргөндө сүйүнгөнүндөн кучактап өпкүлөп жиберди. Бактыбызга үйдүн ээси жумуштан кайтып келе элек экен. Жатаканадагы кебетем менен шашылыш чыгып кеткендиктен жаныма тыйын-тыпыр алууну унутуп коюптурмун. Айла жок чемоданын, документтерин алып дүкөнгө бекитип, жатаканага алып келип тамактандырдым. Бир тууган агасынын таанышы менен байланыштык. Ал Жаныш аттуу байке Кыргызстанга билет алып берүүгө жана кеткиче үйүндө коноктоого даяр экенин айтты. Ошентип, кечки саат ондо Айнура экөөбүздү Жаныш байке Йеникапы метро станциясынан тосуп алды. Аябай коркуп калган экен, элеңдеп улам аркасын карап “бизди таап албайбы” деп сурап коет. Аны Жаныш байкенин колуна тапшырып жатканымда “Эже, мен сизди эми эч качан унутпайм. Түркияга экинчи келбейм, сөз берем”, деп коштошту.

Айнура тууралуу айта турган болсок, өзү 20 жашта. Кесиби боюнча чач тарач. Стамбулга жакын курбусунун чакыруусу менен үстүбүздөгү жылдын 13-январында келген. Түркчө билбейт жана бул жакта Айлирадан башка таанышы жок. Курбусу бир жыл мурун бир түрк жараны менен баш кошкон экен. Ал дагы чач тарач болуп иштегендиктен курбусун салондо чогуу иштейбиз деп чакырып алган.Салондо иштеп жатып түрк эркектеринин ар кандай тийишүүсүнө мажбур калган Айнура “мен мындай жерде иштей албайм” дегенде, Айлира менен Венера аттуу айым “эч нерсе болбойт, көнүп кетесиң “ дешкен. “Болду иштебейм, кетем” деп баштаганда Венера аны Үмрание районундагы Ахмед аттуу бир түрктүн үйүнө киргизип берип койгон. Ахмед ага өзү, үй-бүлөсү жана жашоосу жөнүндө айтып, мен менен калсаң сага муну-тигини алып берем деп азгырып баштаган. Колунан кармап, чачтарынан гана сылаганы болбосо, башка түрдүү кордук көрсөткөн эмес. Айнураны айтымында аны акырындан көндүрүп, өзүнө аялдыкка алуу максаты болгон. Ал Ахметтин үйдө жоктугун пайдаланып эжеси менен байланышкан. Эжеси менин шакиртиме, ал болсо мага кабар берип Айнураны куткардык. Буюрса, ал 2-февральда мекенибизге кайтып барат.

P.S: Мындай окуялардын санын азайтуу максатында, Түркияга сапар алуудан мурун кеминде күнүмдүк түрк тилин үйрөнүп алууну, окууга же иштөөгө мыйзамдуу жол менен гана келүүнү сунуштайт элем. Ошондой эле интернеттен келе турган шаар жөнүндө толук маалымат алып жана коопсуздугуңуз үчүн керектүү кызматтардын, уюмдардын номерлерин бир блокнотко жазып коюну унутпаңыздар!

2 comments on “Эже мени куткарыңызчы, алып кетиңизчи…
  1. Привет, Айпери. Очень хорошо, что поделилась очень важной информацией. Я сама впервые побывав в европейской части Стамбула воочию убедилась “отдельным” отношением к иностранкам. А ведь казалось бы Кыргызская Республика и Турция братские страны, много общего. По мне так Стамбул – это международная прогулочная территория и не более.

    • привет Айниса. Отношение “некоторых лиц” к иностранкам не определяет отношение всего турецкого народа к кыргызстанцам. Тем более европейская часть (историческая) Стамбула является центром торговли для приезжих из стран СНГ и ближнего востока.

Комментарий кошуу

Сиздин электрондук почтаңыз жарыяланбайт. Милдеттүү талаалар белгиленген *